Friday, February 15, 2008

ಇಳೆಗಿಳಿದ ಚುಕ್ಕೆಗಳು

ಅಮೀರ್ ಖಾನ್ ನಟಿಸಿ ನಿರ್ದೇಶಿಸಿರುವ "ತಾರೇ ಜಮೀನ್ ಪರ್" ಈಗ ನನ್ನ ೨ ವರ್ಷದ ಪುಟ್ಟನ ಅಚ್ಚುಮೆಚ್ಚಿನ ಚಿತ್ರ. ಆ ಪುಟ್ಟ ಇಶಾನ್-ನನ್ನು "ಅಣ್ಣಾ" ಎನ್ನುತ್ತಾನೆ, ಆತ ನಕ್ಕರೆ ನಗುತ್ತಾನೆ, ಅತ್ತರೆ ಅತ್ತಂತೆ ನಟಿಸುತ್ತಾನೆ. ಆತ ಮಾಡುತ್ತಿರುವುದೆಲ್ಲಕ್ಕೂ ತನ್ನದೇ ಭಾಷೆಯಲ್ಲಿ ರನ್ನಿಂಗ್ ಕಾಮೆಂಟರಿ ಕೊಡುತ್ತಿರುತ್ತಾನೆ. ಆತನ ಜೊತೆ ದಿನಾ ನನಗೂ ಅದೇ ಚಿತ್ರ. ಈಗಾಗಲೇ ನಾನು ಆ ಚಿತ್ರವನ್ನು ಕನಿಷ್ಟ ೧೫ ಸಲ ನೋಡಿರಬಹುದು!

Dyslexia, ಅಂದರೇನು, ಹೇಗೆ ಬರುತ್ತದೆ, ಹೇಗೆ ಗುಣವಾಗುತ್ತದೆ ಎನ್ನುವುದು Autism ತರಹವೇ - ನಿಗೂಢ, ಅತ್ತ ಮಾನಸಿಕ ಕಾಯಿಲೆಯೂ ಅಲ್ಲದ, ಇತ್ತ ಬೌದ್ಧಿಕ ಊನತೆಯೂ ಇಲ್ಲದ ವಿಚಿತ್ರ ಹೆಸರಿನ ರೋಗವಲ್ಲದ ರೋಗಗಳು. ಆದರೆ ಅಮೀರ್ ಹೇಳಹೊರಟಿರುವುದು dyslexia ಕತೆ ಅಲ್ಲವೇ ಅಲ್ಲ; ಅದು ನನ್ನ, ನಿಮ್ಮ, ನಿಮ್ಮ ಪಕ್ಕದ ಮನೆಯ ಪುಟ್ಟ ಹುಡುಗನ/ ಹುಡುಗಿಯ ಕತೆ.

ಮಕ್ಕಳಿಗೆ ಓದು-ಸ್ಪೋರ್ಟ್ಸ್ (ಆಟ ಅಲ್ಲ) ಬಿಟ್ಟರೆ ಜೀವನವೇ ಇಲ್ಲವೇನೋ ಎಂಬಂತೆ ಮಾಡಿರುವ ಈಗಿನ ಆಧುನಿಕತೆಯ ನಗರೀಕರಣದ ನಗದೀಕರಣದ ಪ್ರಪಂಚದಲ್ಲಿ ಇಶಾನ್ ಎಂಬ dyslexia ಹುಡುಗನನ್ನು ಇಟ್ಟುಕೊಂಡು ಬಾಲ್ಯವನ್ನು ಪುನರ್ನಿಮಾಣ ಮಾಡಿದ್ದಾನೆ, ಅಮೀರ್! ಈ ಚಿತ್ರವನ್ನು ಸಂಜಯ್ ಲೀಲಾ ಬನ್ಸಾಲಿಯ BLACK ಗೆ ಹೋಲಿಸಿ ನೋಡಿದರೆ ಈ ಚಿತ್ರ ಏಕೆ ಉತ್ತಮ ಚಿತ್ರ ಎನ್ನುವುದು ಗೊತ್ತಾಗುತ್ತದೆ. ಕೃತಕತೆ ಇಲ್ಲದ ಸಹಜ ಅಭಿನಯದ ತಂದೆ-ತಾಯಿ (BLACKನಲ್ಲಿ! ಉಫ್!!), ಇಶಾನ್ ಅಭಿನಯಿಸಿಯೇ ಇಲ್ಲವೇನೋ ಎನ್ನುವಷ್ಟರ ಮಟ್ಟಿಗೆ ಸಹಜ. ಅಮೀರ್ ಅತಿರೇಕವಿಲ್ಲದೇ ಆಪ್ತನಾಗುತ್ತಾನೆ.

ಈ ಚಿತ್ರದಲ್ಲಿ ಕೆಲವು ದೃಶ್ಯಗಳನ್ನು ಬಿಟ್ಟರೆ, ಎಲ್ಲೂ ಸ್ಟಿರಿಯೋಟೈಪ್ಡ್ ಸೀನುಗಳು ಇಲ್ಲವೇ ಇಲ್ಲ (including Hollywood) ಎನ್ನಬಹುದು. ತುಂಬಾ ವ್ಯಾಚ್ಯವಾಗದೇ ದೃಶ್ಯದಲ್ಲಿ ಕತೆಯನ್ನು ಯಾವ ಮೆಲೋಡ್ರಾಮಾ ಇಲ್ಲದೇ ಆದರೆ ಭಾವೋದ್ವೇಗದಲ್ಲಿ ಕತೆಯನ್ನು ಹೇಳುತ್ತಾ ಹೋಗುತ್ತಾನೆ ಅಮೀರ್. ಹಾಡುಗಳು ಕೆಲವೊಮ್ಮೆ ಕಿರಿಕಿರಿ ಎನಿಸುತ್ತವೆ. ಸ್ಪೇಷಲ್ ಇಫೆಕ್ಟ್ ಇಲ್ಲದಿದ್ದರೆ ಇನ್ನೂ ಚೆನ್ನಾಗಿರುತ್ತಿತ್ತೋ ಏನೋ?

ಇಂಗ್ಲೀಷ್ ಪಠ್ಯದಲ್ಲಿ ಒಂದು ಪದ್ಯವಿತ್ತು (ಬರೆದವರು, ಪದ್ಯದ ಹೆಸರು ಮರೆತು ಹೋಗಿದೆ). ಆ ಪದ್ಯದಲ್ಲಿ ಪುಟ್ಟ ಪೋರ ತಂದೆಯ ಹತ್ತಿರ ಖುಷಿಯಲ್ಲಿ ಓಡಿ ಬರುತ್ತಾನೆ, ತಂದೆ ಯಾವುದೋ ಕೆಲಸದಲ್ಲಿ ಮಗ್ನ. ಏಕಾಗ್ರತೆ ಭಂಗವಾದದಕ್ಕೆ ಕೋಪದಲ್ಲಿ ಬಯ್ಯುತ್ತಾನೆ. ಮಗ ಅಳುತ್ತ ತನ್ನ ಖೋಲಿಗೆ ಹೋಗುತ್ತಾನೆ. ಎಲ್ಲ ಕೆಲಸ ಮುಗಿಸಿ ತಂದೆ ಮಗನ ಕೋಣೆಗೆ ಹೋಗಿ ನೋಡಿದರೆ, ಪುಟಾಣಿಗೆ ಗಾಢ ನಿದ್ದೆ; ಕೈಯಲ್ಲಿ-ಪಕ್ಕದಲ್ಲಿ ಒಡೆದು ಹೋದ ಕಪ್ಪೆ ಚಿಪ್ಪುಗಳು, ಮುರಿದು ಹೋದ ವಸ್ತುಗಳು, ಕಲ್ಲುಗಳು ... ಏನೇನೋ! ತಂದೆ ಮಗನಲ್ಲಿ ಕ್ಷಮೆ ಕೇಳುತ್ತಾನೆ, ಮೌನದಲ್ಲಿ. ಬಹುಷಃ ಈ ಪದ್ಯ ಬರೆದು ೫೦ ವರ್ಷಗಳೇ ಆಗಿರಬಹುದು. ಈ ಸಿನೆಮಾ ನೋಡುವಾಗ ಈ ಪದ್ಯ ನೆನಪಾಯಿತು, ಆದರೆ ಇನ್ನೂ ಆ ಪದ್ಯ ಸಿಗುತ್ತಿಲ್ಲ.

2 comments:

  1. ಆ ಇಂಗ್ಲಿಶ್ ಪದ್ಯವನ್ನು ನಾನೂ ಓದಿದ್ದೇನೆ (ಬಹಳ ವರ್ಷಗಳ ಹಿಂದೆ). ನನಗೆ ನೆನಪಿರುವ ಮಟ್ಟಿಗೆ ಆ ಮಗುವಿಗೆ ತಾಯಿ ಇರುವದಿಲ್ಲ ಎಂದು ಆ ಪದ್ಯದಲ್ಲಿ ಸೂಚಿತವಾಗಿದೆ.

    ReplyDelete
  2. ಸುನಾಥ್,
    ನೀವು ಬರೆದದ್ದು ನಿಜ, ಆದರೆ ಆ ಪದ್ಯ ಸಿಕ್ಕಿತಾ?
    ಕೇಶವ್

    ReplyDelete